Alisher Navoiy va Zahiriddin Muhammad Bobur — turkiy tafakkur va adabiyotning ikki yorqin namoyandasi bo‘lib, ular milliy ma’naviyatimiz va tariximizning ajralmas qismi hisoblanadi. Ularning ijodi nafaqat o‘tgan asrlar uchun, balki bugungi kunda ham yosh avlodni tarbiyalashda muhim ahamiyat kasb etadi.

Navoiy ijodi

Alisher Navoiy — o‘zbek adabiy tilining asoschisi va so‘z san’ati ustasi. Uning “Xamsa” asari va boshqa yirik yodgorliklari insonparvarlik, ma’naviyat va adolat g‘oyalarini o‘zida mujassamlashtirgan. Navoiy ijodida milliy o‘zlikni anglash, tafakkur va ruhiy kamolot masalalari ustuvor o‘rin egallaydi.

Bobur merosi

Zahiriddin Muhammad Bobur — buyuk sarkarda, shoir va tarixchi. Bobur “Boburnoma” asari orqali tarix, siyosat va ma’naviyat masalalarini o‘ziga xos badiiy til bilan yoritgan. Uning ijodida vatanparvarlik, jasorat va adolat g‘oyalari markaziy o‘rin tutadi.

Tadbir haqida

Joriy yilning 4-fevral sanasida UzGasTrade AJ xodimlari uchun “Navoiy va Bobur — milliy tafakkur va ma’naviyatimizning ikki buyuk ustuni” mavzusida ma’naviy-ma’rifiy tadbir tashkil etildi.

Tadbirda Respublika Ma’naviyat va ma’rifat markazi huzuridagi Ijtimoiy-ma’naviy tadqiqotlar instituti yetakchi ilmiy xodimi, falsafa fanlari bo‘yicha falsafa doktori, dotsent, O‘zbekiston Yozuvchilar uyushmasi a’zosi, “Ma’naviyat fidoyisi” ko‘krak nishoni sohibi hamda “Shuhrat” medali sovrindori Axrorova Shaxlo O‘rinboyevna ishtirok etib, Navoiy va Bobur hayoti hamda ijodiga oid qiziqarli ma’lumotlar bilan o‘rtoqlashdi.

Tadbir yakunida ruboiy va g‘azallar o‘qilib, yig‘ilganlarda katta taassurot — g‘urur va faxr tuyg‘ulari uyg‘otdi.

Navoiy va Bobur ijodiy merosi yosh avlodga ma’naviy tarbiya berishda muhim vosita hisoblanadi. Ularning boy merosini o‘rganish va targ‘ib etish jamiyatimizda yuksak ma’naviy muhitni mustahkamlashga xizmat qiladi.