Bugun “Yoshlar kuni” doirasida yoshlarning raqamli bilim va ko‘nikmalarini oshirish, innovatsion fikrlashini rivojlantirish hamda zamonaviy biznes yondashuvlari bilan tanishtirish maqsadida “UzGasTrade” AJning bir guruh yosh xodimlari “Meta Small Business Practicum” amaliy seminarida ishtirok etdi. Tadbir davomida ishtirokchilarga raqamli marketing, ijtimoiy tarmoqlarda biznesni rivojlantirish, brend yaratish, zamonaviy reklama vositalaridan samarali foydalanish hamda biznes jarayonlarini raqamlashtirish bo‘yicha amaliy tavsiyalar berildi. Shuningdek, mutaxassislar tomonidan sun’iy intellekt texnologiyalarining biznes va kommunikatsiya jarayonlaridagi o‘rni, raqamli transformatsiya imkoniyatlari hamda zamonaviy mehnat bozorida talab etilayotgan ko‘nikmalar yuzasidan taqdimotlar o‘tkazildi. Mazkur seminar “Yoshlar kuni” tadbirlari doirasida yoshlarning zamonaviy bilimlarini boyitish, ularning innovatsion g‘oyalarga bo‘lgan qiziqishini oshirish hamda kasbiy rivojlanishini qo‘llab-quvvatlashga xizmat qildi. “UzGasTrade” AJda yosh xodimlarning intellektual salohiyatini yuksaltirish, ularni ilg‘or tajriba va zamonaviy bilimlar bilan tanishtirishga qaratilgan tadbirlar izchil davom ettirilmoqda.